TCS Laptop Monitoring Tool: Employee Tracking Report 2026

 

Kal subah meri aadat ke hisaab se maine 9:17 baje apna TCS ka laptop on kiya. Chai haath me thi, Teams ka green dot on hua, Outlook sync hone laga. Sab kuch roz jaisa hi tha. Par 11 baje ke aas-paas mujhe ek ajeeb si baat mehsoos hui. Mera system thoda slow tha, task manager me ek naya process chal raha tha jiska naam maine pehle kabhi nahi dekha tha. Maine socha IT team ne koi update kiya hoga, ignore kar diya. Dopahar me lunch ke baad jab main smoking zone me khada tha, tab mere ek senior ne dheere se bola, "Suna hai? Naya monitoring tool aaya hai." Main has pada, "Kaunsa monitoring? Hum toh pehle se hi client ke VDI par kaam karte hain." Usne bola, "Nahi, ab apne TCS ke laptop par bhi. Jo app kholega, kitni der kholega, sab track hoga."

Meri hansi band ho gayi- Shaam tak mere 3 WhatsApp groups me same link ghum raha tha. Moneycontrol ne report kiya tha aur Outlook Business ne usko cover kiya tha - TCS ne apne employees ke laptops par ek Digital User Experience Monitoring Tool secretly install kar diya hai. Ek aam employee kya sochta hai? Dekho, main TCS ko galat nahi bol raha. Main 2021 se TCS me hoon, Pune Hinjewadi me. TCS ne mujhe us time naukri di jab market poora down tha. Meri family Umarkhed me rehti hai, yahan se main unko support karta hoon. Company ke liye mere dil me respect hai.

Lekin is baar jo hua usse ek ajeeb sa dar lag raha hai- Hum sab jaante hain ki hum client ka kitna sensitive data handle karte hain. US ke banks, UK ke retail chains. Ek screenshot bhi leak ho gaya toh company par million dollars ka fine lag sakta hai. Isliye main samajhta hoon ki data security bahut zaruri hai. Agar company bolti ki "Dekho, hum ek security tool laga rahe hain taaki koi data bahar na jaaye," toh main pehla banda hota jo bolta, "Bilkul lagao." Problem ye hai ki bataya hi nahi gaya. Koi official mail nahi, koi HR ka townhall nahi, koi manager ne team meeting me mention bhi nahi kiya. Bas ek din tool aa gaya. Aur jab bina bataye koi cheez aati hai, toh dimaag me sabse pehle negative hi aata hai. Kya ye meri performance dekhega? Kya mera manager dekhega ki main dopahar me 15-minute YouTube par tha? Kya isse mera appraisal affect hoga? Mere saath wale cubicle me ek ladka hai, uski shaadi next month hai. Wo lunch time me shaadi ke cards ke designs dekhta tha apne laptop par. Kal usne mujhse pucha, "Ab ye bhi track hoga kya?"

Ye tool asal me karta kya hai- Report me jo likha hai uske hisaab se ye tool ye track kar sakta hai: Tumne kaunsi application open ki. Us application par kitna time spend kiya,Tum kab active the, kab idle the. Abhi tak ye clear nahi hai ki ye data kis level par collect ho raha hai. Kya ye individual employee ko naam se track karta hai? Ya poora data ek jagah pool hota hai aur sirf security team dekhti hai? Ya fir ye data managers ko bhi dikhega? TCS me hum 5 lakh 90 hazar se zyada log hain. Itne logon ka har second ka data collect karna, usko store karna, usko analyse karna - ye khud me ek bahut bada kaam hai. Kya company sach me itna sab karegi?

Cognizant wali kahani yaad hai- Ye pehli baar nahi ho raha. Pichle saal hi Cognizant me ProHance naam ke tool ko leke bahut bada hungama hua tha. Wo tool bhi same kaam karta tha - login time, kaunsi website kholi, mouse kitna hilaya. Tab employees ne bahut protest kiya tha. Tab Cognizant ne bola tha ki "Ye tool sirf kuch specific projects par client ke kehne par lagaya gaya hai, isse hum process samajhte hain ki kaam kaise hota hai, ye kisi ke performance ko judge karne ke liye nahi hai." Lekin ek baar trust toot jaaye toh wapas banana mushkil hota hai. Tab se har IT employee ke dimaag me ye dar baith gaya hai ki company uske laptop se usko monitor kar rahi hai.

Zscaler ka connection kya hai- Kuch mahine pehle maine TCS ke internal portal par ek news dekhi thi. TCS ne Zscaler naam ki ek badi cybersecurity company ke saath partnership kiya tha. Usse unhone TCS Workspace Experience Studio naam ka ek product banaya tha. Us product ka kaam tha - zero-trust security dena, matlab har user ko verify karna, aur digital experience ko monitor karna. Ab jo tool humare laptops par laga hai, kya wo wahi Zscaler wala tool hai? Kya TCS pehle apne employees par test kar rahi hai aur baad me clients ko bechegi? Iska jawab abhi kisi ke paas nahi hai. TCS ne is par koi official statement nahi diya hai.

Hum kya chahte hain? Bas sachchai- Main, aur mere jaise hazaron employees, company se ladna nahi chahte. Hum bas itna chahte hain ki company saaf-saaf bole. Ek simple mail bhej de - "Team, hum ek Digital User Experience Monitoring tool roll out kar rahe hain. Iska purpose data security hai. Ye data individual performance ke liye use nahi hoga. Ye data sirf security team ke paas rahega." Itna bolne se kya chala jayega? Balki trust aur badhega. Monitoring se productivity nahi badhti. Dar se log aur slow kaam karte hain. Agar mujhe har 10 minute me ye sochna pade ki main kaunsi app khol raha hoon, toh main apna asal kaam - coding - kaise karunga? Aaj shaam ko jab maine laptop band kiya, toh ek baar phir task manager dekha. Wo process abhi bhi chal raha tha. Neeche uska naam likha tha, aur uske saamne CPU usage 2% dikh raha tha. 2% bahut chota number hai, lekin us 2% ne mere dimaag me 100 sawal khade kar diye hain. Agar aap bhi TCS, Infosys, Wipro ya kisi bhi IT companyme kaam karte hain, kya aapke laptop par bhi aisa koi tool dikha hai? Aapko kya lagta hai, ye security ke liye zaruri hai ya ye privacy ka violation hai? Neeche comment me apni kahani zarur likhiye, kyunki ye kahani sirf meri nahi, hum sabki hai.